បណ្ណាល័យ

អំពីបណ្ណាល័យ

សាកលវិទ្យាល័យ ពាណិជ្ជសាស្ត្រ អេស៊ីលីដា បានសាងសង់បណ្ណាល័យដែលមានទំហំ ២៨ម X ២៨ម = ៧៨៤ ម៉ែត្រក្រឡា កំពស់ ១៤,១០ម៉ែត្រ ស្មើនឹង៣ជាន់ ស្របទៅតាមបទដ្ឋានស្តង់ដាបច្ចេកទេស ប្រកបដោយបរិស្ថានល្អ ខ្យល់អាកាសបរិសុទ្ធ ពន្លឺចេញ-ចូលគ្រប់គ្រាន់ កន្លែងអង្គុយអានមានផាសុកភាព ផ្លូវដើរធំទូលាយ បរិយាកាសស្ងប់ស្ងាត់ មិនមានសម្លេងរំខាន ដែលផ្តល់អំណោយផលដល់ការសិក្សា ការស្រាវជ្រាវរបស់គ្រូបង្រៀន និស្សិត និងកម្មករនិយោជិតនៃសាកលវិទ្យាល័យ។ បច្ចុប្បន្ននេះ បណ្ណាល័យសាកលវិទ្យាល័យមានសៀវភៅជាង ៥០០០ក្បាល និងជាង ២០០០ ចំណងជើង។ សៀវភៅជាភាសាខ្មែរមានចំនួន ៣៨% និងភាសាបរទេសមានចំនួន ៦២% សម្រាប់ជាប្រយោជន៍ដល់ការសិក្សា ការស្រាវជ្រាវ របស់និស្សិត គ្រូបង្រៀន និងសាធារណជនទូទៅផងដែរ។

ម៉ោងបើកបម្រើសេវាបណ្ណាល័យ

បណ្ណាល័យបើកដំណើរការជារៀងរាល់ថ្ងៃ និងមានពេលម៉ោងបម្រើដូចខាងក្រោម៖

សម្រាប់ថ្ងៃចន្ទ ដល់ថ្ងៃសុក្រ
ពេលព្រឹក ចាប់ពីម៉ោង ០៧:៣០នាទី រហូតដល់ម៉ោង ២០:៣០នាទី
សម្រាប់ថ្ងៃសៅរ៍ ដល់ថ្ងៃអាទិត្យ
ពេលព្រឹក ចាប់ពីម៉ោង ០៧:៣០នាទី រហូតដល់ម៉ោង ១៦:៣០នាទី លើកលែងតែថ្ងៃបុណ្យឈប់សម្រាកដែលបានកំណត់ដោយសាកលវិទ្យាល័យ។

ការផ្តល់ព័ត៌មាន

បណ្ណារក្ស/បុគ្គលិកបណ្ណាល័យ ត្រូវផ្តល់ព័ត៌មាន និងណែនាំដល់អ្នកអាន ដើម្បីឱ្យពួកគេយល់ដឹងពីបទបញ្ជាផ្ទៃក្នុងរបស់បណ្ណាល័យ និងរបៀបប្រើប្រាស់បណ្ណាល័យ។ អ្នកអានអាចទាក់ទងទៅបណ្ណារក្ស/បុគ្គលិកបណ្ណាល័យ នៅកន្លែងផ្តល់ព័ត៌មាន ដើម្បីទទួលបានព័ត៌មាននានាដែលទាក់ទងនឹងកិច្ចការសិក្សា ការស្រាវជ្រាវ ការប្រើប្រាស់បណ្ណាល័យ ការស្វែងរកសៀវភៅ។ល។

សិទ្ធិក្នុងការប្រើប្រាស់

កម្មករនិយោជិត អេស៊ីលីដា គ្រូបង្រៀន សិក្ខាកាម សិស្ស និស្សិត
កម្មករនិយោជិត អេស៊ីលីដា គ្រូបង្រៀន សិក្ខាកាម សិស្ស និស្សិត អាចចូលអានសៀវភៅ/ឯកសារផ្សេងៗនៅក្នុងបណ្ណាល័យ លុះត្រាតែបង្ហាញអត្តសញ្ញាណប័ណ្ណការងារ ប័ណ្ណសម្គាល់គ្រូបង្រៀន សិក្ខាកាម សិស្ស និស្សិត។

រយៈពេលនៃការខ្ចី

សាកលវិទ្យាល័យផ្តល់រយៈពេលខ្ចីសៀវភៅ/ឯកសារផ្សេងៗ ដោយកំណត់តាមតារាងខាងក្រោម៖

ប្រភេទអ្នកខ្ចី	ចំនួន	រយៈពេល
សិក្ខាកាម សិស្ស និស្សិត	០២ ច្បាប់	១៤ ថ្ងៃ
កម្មករនិយោជិតអេស៊ីលីដា	០៤ ច្បាប់	៣០ ថ្ងៃ
គ្រូបង្រៀន (ពេញម៉ោង និងក្រៅម៉ោង)	០៤ ច្បាប់	៣០ ថ្ងៃ
ប្រធានក្រុមបច្ចេកទេសមុខ ជំនាញ និងមុខវិជ្ជា	០៤ ច្បាប់	៩០ ថ្ងៃ

ការសងត្រលប់

អ្នកខ្ចីត្រូវសងត្រលប់នូវសៀវភៅ/ឯកសារ ជូនបណ្ណារក្ស/បុគ្គលិកបណ្ណាល័យដោយខ្លួនផ្ទាល់ ឬតាមរយៈបុគ្គលផ្សេង ក្នុងករណីមានធុរៈតាមកាលបរិច្ឆេទដែលបានកំណត់។
ករណីថ្ងៃដែលត្រូវសងត្រលប់ប៉ះថ្ងៃបុណ្យឈប់សម្រាក ដែលបានកំណត់ដោយសាកលវិទ្យាល័យ អ្នកសុំខ្ចីត្រូវសងត្រលប់នូវសៀវភៅ/ឯកសារ នៅមុនពេលថ្ងៃបុណ្យឈប់សម្រាក ឬក្រោយថ្ងៃបុណ្យឈប់សម្រាក០១ថ្ងៃ។

ការខ្ចីសារជាថ្មី

អ្នកខ្ចីអាចខ្ចីសៀវភៅ/ឯកសារបន្ដបាន លុះត្រាសងត្រលប់មកបណ្ណារក្ស/បុគ្គលិកបណ្ណាល័យវិញតាមកាលកំណត់ជាមុនសិន ដើម្បីបញ្ជាក់ឱ្យដឹងថាសៀវភៅ/ឯកសារ ដែលបានខ្ចីនោះនៅគង់វង្សទើបអាចខ្ចីបន្ត។ ក្នុងករណីមានអ្នកផ្សេងត្រូវការខ្ចីសៀវភៅ/ឯកសារផ្សេងៗនោះ ហើយបានកក់ទុកមុន បណ្ណារក្ស/បុគ្គលិកនឹងផ្តល់អាទិភាពក្នុងការខ្ចីទៅអ្នកខ្ចីថ្មីនោះ។
អ្នកខ្ចីដែលមានបំណងខ្ចីសៀវភៅ/ឯកសារផ្សេងៗដទៃទៀត ត្រូវយកសៀវភៅ/ឯកសារដែលបានខ្ចីមកសងត្រលប់ជាមុនសិន ទើបអនុញ្ញាតឱ្យខ្ចីសៀវភៅ/ឯកសារផ្សេងៗដទៃទៀត។

ការផាកពិន័យលើការសងត្រលប់យឺតយ៉ាវ

ករណីការសងត្រលប់មកវិញនូវសៀវភៅ/ឯកសារផ្សេងៗ ហួសរយៈពេលកំណត់ អ្នកខ្ចីត្រូវរងការផាកពិន័យជាប្រាក់ចំនួន ១,០០០រៀលក្នុង០១ថ្ងៃ សម្រាប់សៀវភៅ/ឯកសារផ្សេងៗ មួយក្បាល/ច្បាប់ ដោយមិនរាប់បញ្ចូលថ្ងៃឈប់សម្រាកបុណ្យជាតិ-អន្តរជាតិ។

សំណងលើការបាក់បែក ខូចខាត និងបាត់បង់

អ្នកខ្ចីត្រូវតែទទួលខុសត្រូវលើការបាក់បែក ឬខូចខាតសៀវភៅ/ឯកសារផ្សេងៗដែលខ្លួនបានខ្ចីពីបណ្ណាល័យ និងត្រូវសងមកវិញជាសាច់ប្រាក់ទៅតាមការបាក់បែក ឬ ខូចខាត។
អ្នកខ្ចីត្រូវតែទទួលខុសត្រូវ ករណីធ្វើឱ្យបាត់បង់សៀវភៅ/ឯកសារផ្សេងៗរបស់បណ្ណាល័យដែលខ្លួនបានខ្ចី។ អ្នកខ្ចីអាចទិញសងនូវប្រភេទសៀវភៅ/ឯកសារដែលបានធ្វើបាត់ ឬសងមកវិញជាសាច់ប្រាក់ទៅតាមថ្លៃដើមនៃសៀវភៅ។

ការប្រើប្រាស់កុំព្យូទ័ររបស់បណ្ណាល័យ

កម្មករនិយោជិត អេស៊ីលីដា/គ្រូបង្រៀន/សិក្ខាកាម/សិស្ស/និស្សិត អាចស្នើសុំប្រើប្រាស់កុំព្យូទ័ររបស់បណ្ណាល័យ ដោយកំណត់រយៈពេលប្រើប្រាស់ ០៣ម៉ោង សម្រាប់ការស្នើសុំ១លើក។ ការប្រើប្រាស់កុំព្យូទ័ររបស់បណ្ណាល័យ គឺសម្រាប់តែការសិក្សា ស្រាវជ្រាវ ឬការវាយអត្ថបទផ្សេងៗតែប៉ុណ្ណោះ។ ក្នុងករណីការប្រើប្រាស់កុំព្យូទ័រខុសពីការកំណត់ បណ្ណារក្ស/បុគ្គលិកបណ្ណាល័យ មានសិទ្ធិបញ្ឈប់ការប្រើប្រាស់ភ្លាម។

បទបញ្ជាទូទៅក្នុងបណ្ណាល័យ

អ្នកដែលចូលមកក្នុងបណ្ណាល័យត្រូវបំពេញឈ្មោះ អាស័យដ្ឋាន ពេលម៉ោងចេញ-ចូល និង ចុះហត្ថលេខា នៅផ្លូវចូលនៃបណ្ណាល័យដើម្បីទុកជាឯកសារ។
ត្រូវរក្សាភាពស្ងៀមស្ងាត់នៅក្នុងបណ្ណាល័យ។
អ្នកអានត្រូវបង្ហាញអត្តសញ្ញាណប័ណ្ណសម្គាល់នៅពេលចូលក្នុងបរិវេណបណ្ណាល័យ។
អ្នកអានគ្រប់រូបត្រូវទុកកាបូប និងរបស់របរផ្សេងៗនៅកន្លែងទទួលក្បែរទ្វារចូលបណ្ណាល័យ។ អនុញ្ញាតឱ្យយកចូលក្នុងបណ្ណាល័យតែសៀវភៅកំណត់ចំណាំ និងសៀវភៅ/ឯកសារ ដែល ត្រូវយកមកសងត្រលប់ និងមិនអនុញ្ញាតឱ្យទុករបស់ដែលមានតម្លៃនៅកន្លែងផ្ញើរបស់ជាដាច់ខាត។ ក្នុងករណីមានការបាត់របស់របរផ្សេងៗផ្ទាល់ខ្លួន បណ្ណារក្ស/បុគ្គលិកបណ្ណាល័យ នឹងមិនទទួលខុសត្រូវលើការបាត់បង់នោះឡើយ។
ឧបករណ៍-សម្ភារដែលអាចធ្វើឱ្យអន្តរាយដល់ឧបករណ៍-សម្ភារបណ្ណាល័យ មិនត្រូវបានអនុញ្ញាតឱ្យយកចូលក្នុងបណ្ណាល័យឡើយ។ ឧបករណ៍-សម្ភារទាំងនោះរួមមានដូចជា៖ ចំណី អាហារ បារី ភេសជ្ជ បង្អែម ស្ករកៅស៊ូ ជ័រកាវ ដបទឹកខ្មៅ/ពណ៌ ទឹកសំអាតគ្រប់ប្រភេទ ឧបករណ៍ដែលមុតស្រួច និងអាវុធគ្រប់ប្រភេទ ។ល។
សៀវភៅ/ឯកសារដែលអានហើយ អ្នកអានចាំបាច់ត្រូវយកទៅដាក់តាមកន្លែងដើមវិញ ក្នុងករណីពិសេស អាចទុកនៅលើតុអង្គុយបាន។
អ្នកអានមិនអនុញ្ញាតឱ្យគូសវាស ហែក បត់ ឬកំណត់សម្គាល់នៅលើសៀវភៅ/ឯកសារផ្សេងៗ ឬ ធ្វើឱ្យខូចខាតបាត់បង់ទ្រព្យសម្បត្តិបណ្ណាល័យដោយវិធីណាមួយទេ។ ប្រសិនបើនរណាម្នាក់ត្រូវបានរកឃើញថា បានប្រព្រឹត្តទង្វើខាងលើអ្នកនោះនឹងទទួលនូវការពិន័យ។ សៀវភៅ/ឯកសារដែលបានខ្ចីត្រូវរក្សាឱ្យបានល្អនូវគុណភាព និងទ្រង់ទ្រាយដើម។
អ្នកអានត្រូវមានសុជីវធម៌ ចំពោះគ្នាទៅវិញទៅមកគ្រប់ពេលវេលា។
ចៀសវាងនូវការនិយាយ និង/ឬសើចខ្លាំងៗ ការហ៊ោកញ្ជ្រៀវ និងសកម្មភាពទាំងឡាយណាដែលនាំឱ្យរំខានដល់អ្នកអានដទៃ។ ប្រសិនបើចាំបាច់ត្រូវការជជែក ពិភាក្សា ត្រូវនិយាយតិចៗ។
ត្រូវបិទទូរស័ព្ទដៃ ឬបិទសម្លេងរោរ៍ ត្រូវចៀសវាងការហៅចេញ ឬការទទួលទូរស័ព្ទនៅក្នុងបរិវេណបណ្ណាល័យ។
មុននឹងប្រើប្រាស់ឧបករណ៍-សម្ភារដែលមាននៅក្នុងបណ្ណាល័យ អ្នកប្រើប្រាស់ត្រូវសុំការអនុញ្ញាតពីបណ្ណារក្ស/បុគ្គលិកបណ្ណាល័យជាមុនសិន និងត្រូវមានការទទួលខុសត្រូវចំពោះការប្រើប្រាស់។ ករណីមានការខូចខាត ឬបាត់បង់ដោយប្រការណាក៏ដោយ អ្នកប្រើប្រាស់ត្រូវសងការខូចខាតទាំងនោះ តាមការកំណត់របស់បណ្ណាល័យ។
រាល់ការប្រើប្រាស់ឧបករណ៍ផ្សេងៗដូចជា: computers, Laptop, and player មិនត្រូវបង្កសំឡេងនាំឱ្យរំខានអ្នកអានដទៃទៀតឡើយ។
មិនត្រូវនាំយកឧបករណ៍-សម្ភារបណ្ណាល័យចេញពីបណ្ណាល័យ ដោយគ្មានការអនុញ្ញាតពីបណ្ណារក្ស/បុគ្គលិកបណ្ណាល័យឡើយ។
មិនអនុញ្ញាតឱ្យអ្នកដទៃខ្ចីបន្តនូវឧបករណ៍-សម្ភារដែលបានខ្ចីពីបណ្ណាល័យ។
បណ្ណារក្ស/បុគ្គលិកបណ្ណាល័យ មានសិទ្ធិព្រមាន ឬបណ្តេញបុគ្គលណាដែលមិនគោរពនូវបទបញ្ជាផ្ទៃក្នុង ចេញពីបរិវេណបណ្ណាល័យ។
បណ្ណារក្ស/បុគ្គលិកបណ្ណាល័យ មានសិទ្ធិសុំត្រួតពិនិត្យបុគ្គលណាដែលសង្ស័យថាបានលួចលាក់យកសៀវភៅ/ឯកសារផ្សេងៗ ឬឧបករណ៍ សម្ភារ របស់បណ្ណាល័យ៕